Skip to Content

Пинициллин.

Апрель 12, 2018 Аварский

Цо-цо гIажаибал, нилъ хIикмалъизе ккарал, божизе захIматал жал ккола гьаб дунялалда цо-цо мехалъ. Нилъеда ракIалдаго рукIинчIел жал лъугьуна. РакIалдаго гьечIеб бакIалда данде чIвала нилъее церего кIочон рукIарал чагIи ва гьединго нилъеца чидае гьабураб лъикIлъи. Гьедин ккун буго гьал чагIазулги.

Цо нухалда, колода жиндирго рокъов вачIунев фермерасда рагIанила, аскIобго бугеб хьуцIилъа кумек гьарун ахIтIолев чиясул гьаракь. Гьев гьебсагIатго гьаракь бахъараб рахъалдехун кумекалъе вортанила. Гьесда вихьанила хьуцIилъе ккун, вагъарухъ жанив цIан унев цо вас. Гьев къватIив ворчIизе хIаракат бахъулев вугоанила, амма гьесул щибаб вагъа-вачариялъ гьев жаниве цIан гурони, къватIиве ворчIунеб хIал гьечIоанила. Чара хвеялъги хIинкъиялъги васги вукIанила чIечIого ахIтIолев.

Фермерас аскIобго букIараб гъотIодаса, кодоб букIараб кIудияб нусалъ, халатаб гIаркьел къотIанила ва гъанкъулесухъе бегьанила. Вас доб гIаркьелги ккун квеш лъикI хIинкъи гьечIеб бакIалде ворчIун хвасарлъанила.

— Вилъа гьанже дихъе рокъове, — ян абунила фермерас. — Доле дир мина. Мун гIодовиччазеги, виччарав вакъвазеги, хинлъизеги ккола.

— Гуро, вачIинаро дун духъе, — ян васас бетIер кIибикIанила. – Дихъ валагьун рахIатхун эменги ватила дир, дун кинниги рокъовго ина.

Роххалил цIурал бераз фермерасухъеги валагьун, гьесие баркалаги кьун вас векерун жиндирго нухалъ анила.

Нахъисеб къоялъ радал фермерасда жиндир рагьда чIун чIухIараб пайтун бихьанила, цIакъго берцинал чуязда нахъа бараб. Гьелдаса къватIив вахъанила лъикIго бечедаб ретIа-къаялъул чи ва гьикъанила:

— Дуцайищ сон дир вас гъанкъулелъуса хвасар гьавурав?

— У, дица гьавуна, — ян жаваб кьунила фермерас.

— Дуца дир бищунго вокьулев васги хвасар гьавун гьабураб гIаданлъи дие гьедин гIадада тезе бокьун гьечIо, дун сундего вачIизе гьечIо, чIвае дурго гьелъухъ кколеб мухьалда цIар.

— Дица гьабураб иш буго, бокьарав гIадатияв чиясги гьабизе букIараб жо. Гьединаб жоялъухъ мухьги босуларо. Диеги щибго кьезе кколаро, дун гьелда хIажатав чиги гьечIо, — ян жаваб кьунила фермерас.

— Абе дуца дурго багьа, гьев вас дие цIакъго хирияв вуго.

— Дие гьеб ишалда тIаса тIокIаб хабар бицине бокьун гьечIо.- Дуе къо –мех лъикI, — анги абун фермерас гьесда мугъ банила нахъе инеян.

Гьебго параялъ цо вас вачIанила фермерасул рокъоса къватIиве векерун.

— Гьадав вас дурищ? – ян гьикъанила бечедав гьоболас.

— У, дир вуго, — ян разиго жаваб кьунила гьасги.

— Батани, рачIа гьадин гьабизе: Дица дур гьев вас вачина Лондоналде ва цIализавила дирго гIарцухъ. Гьев васги мунго гIадав: гIадилав, сахаватав, ритIухъав ватани, мунги дунги рекIекълъиларо гьаб нилъеца гьабураб хIукмуялда.

Гьеб къотIиялда кIиялгоги разилъун, гьоболас вачун Лондоналде анила фермерасул вас.

Анила чанго сон гьоркьоб.

Гьес цин школа, хадуб медицинаялъул институтги лъугIизабун лъикIав тохтур вахъанила. Гьединго гьев дунялалдаго машгьурлъанила, Пинициллин дару ургъарав, гьеб рагьарав чи хIисабалда. Гьесда цIарги букIанила Александр Флеминг.

Рагъда цебесеб соналъ Лондоналъул бищунго бечедаб клиникаялде захIматаб хIалалда вачIанила гьуърулъ квачалъул унти ккарав бечедав чиясул вас.

Гьев вас сах гьавунила гьадав А.Флемингица ургъун бахъараб дару — пинициллиналъ.

Гьев фермерасул вас Лондоналда цIализавурав чиясда цIар букIанила Рудольф Черчилль. Гьесул васасда цIар букIанила Уинстон Черчилль- гьадаб даруялъ сахлъизавурав, ва хаду Англиялъул премьер-министрлъун вахъарав. ВатIанияб рагъул заманаялъги жив гьеб хIалтIуда вукIарав.

Уинстон Черчиллица цо нухалда абунила: «Дуца гьабураб лъикIлъи духъего нахъ буссуна», — ян.

P.S

Гьаб дица таржама гьабураб жоялъул пикру гьабулаго нилъеда бичIчIулеб буго, нилъеца чидае гьабураб лъикIлъи, кида бугониги нилъее батулеб букIин, нилъер заманаялъ, гьабураб лъикIлъи бичIчIуларел чагIи гIемер дандчIваниги.
Сайгидахмед Ахмеднабиев

Предыдущий
Следующий

Ответить

Ваш email не будет опубликован Обязательное поле для заполнения *

*