Skip to Content

Хирияй магIарулай! АхIулищ дуца лъималазе кинидахъ кучIдул?

Март 22, 2018 Аварский

 

Баху МухIидинова

Гьарун щвараб цIадал щуб,

ЦIалун щвараб бакъул нур,

АхIизе цIар берцинав,

Бихьизе куц берцинав.

Гьанги белъун, чед бежун,

Чанавеги унев ав.

Чуги бачун, цIал кьабун,

ЦIоровеги унев ав – илан васасе.

 

Вай дур дада чIахъаяй,

Дардаманалъул гагу.

Дадал васал чIахъаяй,

Хайдакъалъул багIаргIеч.

Бакъда хIотIолъ букIунеб

Бакъан берцинаб мокъокъ,

ХIорлъуданиб букIунеб

Мукъур сурмияб микки.

Берал руго берцинал,

Щиб кьуниги кьоларел,

Кьунсрул руго гьайбатал,

Азар гIиял багьаял – илан ясалъе.

 

Гьардарал-дахIалал гьал кучIдул ахIулаго эбелалъ каранде къан гIолел лъимал. Гъаримзаби, квал-квал гьабичIого букIине, гIурусмультикалги риччан бусаде рехун ругел.

Хирияй магIарулай, духъ бугоха миллаталъул къисмат.  Дуе бокьани, дур лъугьуна эбел-эмен разиял, тухум-кьибил бохарал, миллат чIухIарал лъимал. Дуца бицани, лъала гьезда рахьдал мацI. Дуца малъани, лъала гьезда щал жалали, лъил жалали ва гIумрудул нухда кинал галаби тIамилебали.

Гьаруге, магIарулай, гьал дур хириял лъимал дунялалда билараб талихIкъосараб къавмалъул вакилзабилъун. АхIе гьезие кинидахъ кучIдул.

Тушбабазда речIчIулеб

ЧIорбутIлъундай вахъина.

ЧIухIдаего хьвадулев

Хъергъулъундай лъугьина.

Дандиялги хадур тун,

КIанцIунгодай ина мун?

Цере ругел нахъа тун

Векерунгодай йина, —

Дунял сверун вуссунев,

Бабал сурмияб микки.

Бице лъималазе нилъер тарих: гIемер къо бихьараб бахIарчияб халкъалъул, хIалихьалъи хиянатлъи хIехьолареб миллаталъул… Бице адабияталъул. Бице маданияталъул. Бице. БицинчIеб жо лъаларо. Малъе. МалъичIеб жо босуларо. Мисал бихьизабе. Лъималаз мисал эбел-инсудаса босула.

АхIе, магIарулай, каранде къан лъимергун:

Тушбабазда речIчIулеб

ЧIорбутIлъундай вахъина.

ЧIухIдаего хьвадулев

Хъергъулъундай лъугьина.

Дандиялги хадур тун,

КIанцIунгодай ина мун?

Цере ругел нахъа тун

Векерунгодай йина, —

Дунял сверун вуссунев,

Бабал сурмияб микки – илан.

РикIкIе, магIарулай,

Бабал, бабал, ПатIина,

Щуб чIикIулеб гIанкIил тIинчI,

Щар чIикIулеб катил тIинчI,

ГIарцумаххазул читIир.

Бакълъахъ гочунеб мокъокъ,

Хьонда пештIолеб гIанса,

БагIарнагIлил гIанаби,

ГIакдал нахул кIаркьаби,

МахI гьуинаб хIавагIеч.

Эбелалъе йокьулей

Ракьа гьечIеб чамасдак,

Адаязе хирияй

Ххам борцунеб гIарцул натI – илан.

 

Боял рахъаралъув

Чу багьадурав,

ЧагIи рахъаралъув

Рагъ гъалбацIилав.

ГодекIаниб кьибил

Кьуркьузабурав,

Кьалда бахIарзалги

ХIинкъизарурав.

Росдал гIадамалгун

ГIамал рекъарав,

Вацлъун вихьаги мун

ТIулил яцазда – илан къай каранде лъимер.

 

Гьеле. Гьеле гьеб чIола цебе, гьаб захIматаб хIабургъараб дунялалда мекъаб нухде хIетIе бегьулаго. Эбелалъул гьаракь багъула гIинзуниб, хIалихьалъиялде ракI гьесулаго. ХIелун мугъ къулулаго, кинаб миллаталъул чияли ракIалде щун цIцIавуцIцIуна, цIекIаб гIамал гьабулаго, гIагараб халкъалъул гIадат-гIамал цебе чIола.

Баба. Бице, баба, лъималазе рахьдал мацI. Рахьдада цадахъ бицунеб мацI гьоцIолъун чвахула гьезул рекIелъе. АхIе, баба, лъималазе кинидахъ кучIдул. Киданиги гьелдаса берцинаб бакъан лъималазул гIинда чIваларо.

Раке, улбул, ракIазулъ миллаталъе канлъи кьолел чирахъал, улбузул каранлъ ВатIаналде бугеб рокьуца гурищ нилъер мугIрул аза-азар соназ гвангъун рукIарал.

Бице, эбел, рахьдал мацI.

 

(«Миллат» газеталдаса босараб)

 

 

 

 

Предыдущий
Следующий

Ответить

Ваш email не будет опубликован Обязательное поле для заполнения *

*