Skip to Content

Бардачок.

Апрель 7, 2018 Аварский

МагIарухъ нижер росулъ жанире щвараб бакIалда рукIана цебе росдаца иргаялда лал тIамулел гьоцIаби , хаду машинадул нух росулъе бачIиндал, лал тIамулебги тедал гьенир нижер колхозалъул юк баччунел машинабиги, цогидаб техникаги букIунаан чIезабун.
Дол лъабкъоялда анцIабилел соназ, гъутаналдаса магIарухъе баччулеб ролъги, херги, кIалцIиги камулароан колхозалъул. МагIарухъа рехеги гьел машинаби чIорого унароан, хасго хаслихъ хур-хер жаниб буссиндал. ГIатIиракьалда чIараб гIагарлъиялъе ритIулел картошкадул хъапазул гIемериселъ цIун унаан гьел. ГьитIиналго ГАЗ-5I машинаялъ кIиго тонна гIанасеб гурони бакIлъиги босулароан. Районалда базаралдаги, гIатIиракьалдаги гIемериселъ гьел машинабазде рекIун унаан гIадамал. РукIинчIо гьадин бокьухъе рекIизе тIадагьал машинаби.
Гьединаб цо машинаялде, хIалтIулев вукIана, армиялдаги машинаялде хIалтIулев вукIарав, жиндир хIал алжаналде батаяв дир гьудул Хъиличил Идрисги.
Цо пуланаб Агъвалиб базар букIунеб щамат къоялъ , капотги рагьун машинаялъул мотор букIунелъув квал-квадулев гьесда аскIой ячIуна, Агъвали базаралда ине бокьарай, кIудияб ригьалъул росуцояй ва Идрисида гьикъула:
— Ле вас, мун жакъа Агъваливе ине вугищ, — ан.
— ГьечIо.
— Щай? — Щамат къоялъ базаралде унаан гурищ мун.
— Дуда вихьуларищ дун, машина хун гьеб къачIалев?
— Щиб гьелъул хун бугеб? – ан гьикъула хIамида къулгьугIанги машинаялъул жо лъаларей дой херай кIодоца.
— «Бардачок», — ян абула, махсаро камуларев Идрисица.
ТIокIаб рагIи гьесдаги абичIого, нахъ юсун унаго, данделъаразде, Идрис жакъа унев гьечIин Агъваливе, досул «бардачок» хун бугин, гьев гьеб къач1алев вугин бицунаго рокъой уна, гьеб къоялъ, т1оцебе рагIараб цIияб рагIи лъарай кIодо.
Сайгидахмед Ахмеднабиев

Предыдущий
Следующий

Ответить

Ваш email не будет опубликован Обязательное поле для заполнения *

*