Skip to Content

Aхуыры – раззаг, æгъдауæй — фæзминаг

Август 17, 2017 Осетинский
Диана Дудиева
Ирыстоны бирæ ис курдиатджын фæсивæд, ахуырмæ, спортмæ зæрдæгъæвд чи у, ахæмтæ. Уыдон сæ цард, сæ куыстæй кад кæнынц канд нæ республикæйæн нæ, фæлæ æппæт Уæрæсейæн дæр. Æрыгон фæсивæды ‘хсæн ахæмтæ дæр гыццыл нæй, фырнымдæй йæхи æвдисын чи нæ зоны, фæлæ йæ хъуыддæгтæ ахадгæ кæмæн сты, йæ алы къахдзæф дæр фæзминаг кæмæн у.
Уыдоны нымады ис беслæйнаг чызг Дудиаты Дианæ дæр. Дианæ ацы бонты каст фæцис Цæгат Кавказы хæххон-металлургон институты информацион технологиты факультет, иттæг хорз бахъахъхъæдта дипломон куыст æмæ йын 7 июлы курсы 23 адæймагимæ кадджын уавæры уымæн дæр лæвæрд æрцæудзæн «сырх диплом». Райста, æхсызгонæй чи хъæуы, ахæм дæсныйад — информацион системæтæ экономикæйы. Йæ равзæрст факультет сæ æнцонтæй нæу, иудадзыг ахуыргæнджыты амынддзинæдтæ куы нæ æххæст кæнай, практикон ахуыртæм куы нæ цæуай, уæд фæсте баззадтæ: информацион технологитæ афтæ тагъд ивынц, æмæ дзы бонæн ногдзинад вæййы.
Факультеты деканаты бæрнон кусæг Къарджиаты Светланæ куыд зæгъы, афтæмæй тынг райгонд у факультеты фæсивæдæй: Дзгойты Алан, Гæлуаты Сергей, Багаты Сослан, Базраты Иринæ, Уататы Зæлинæ æмæ бирæ иннæтæ ахуыргæнæг Даттеты Аллæйы разамындæй разæнгардæй архайынц институты æхсæнадон царды, спартакиадæты, æрвылазон сфæлдыстадон ерыстæ «Студентты уалдзæджы» æмæ æндæр хъуыддæгты. Уыдонимæ Хæххон-металлургон институты кад бæрзонд кодта Дудиаты хæрзæгъдау, æфсæрмдзæстыг чызг дæр.
Дианæ скъолайы дæр хорз ахуыр кодта, æнтыстджынæй-иу архайдта республикæйы предметон олимпиадæты математикæйæ, информатикæйæ, ирон æвзаг æмæ литературæйæ, цалдæр хатты бацахста фыццаг бынæттæ. Уый йын баххуыс институтмæ цæугæйæ дæр, — информатикæйы факультетмæ æппæты стырдæр конкурс вæййы æмæ дзы æрмæст хорз бæрæггæнæнтæ райсын фаг нæ вæййы. Фæлæ Дианæ йæхæдæг куыд зæгъы, афтæмæй ахуыры æцæг ад банкъардта Хæххон-металлургон институты, æнæгуырысхойаг зонындзинæдтæ кæмæ ис, ахæм специалист уæвыны тыххæй æдзух чингуытыл бадын кæй хъæуы, уый ам бамбæрста. Æмæ фондз азы дæргъы ахуыр кодта æрмæст иттæг хорз бæрæггæнæнтыл, иста фылдæргонд стипенди, «цыппартæ» йын нымадæй ис 4, иннæтæ «фондзтæ». Чызджы ныййарджытæн, уый æхсызгон куыд нæ уыд, йæ нана та уæлдай тынгдæр цин кæны Дианæйы æнтыстытыл.
Бирæ студенттæй вæййы фехъусæн, ныртæккæ цыфæнды хорз ахуыр кæн, дæ быцъынæг тон, уæддæр æхца куы нæ бафидай, уæд дын ахуыргæнæг хорз бæрæггæнæн нæ сæвæрдзæн, зæгъгæ. Цы йæ æмбæхсæм, ис ахæм ахуыргæнджытæ, фæлварæнты æхца чи райсы, фæлæ студент йæхи куы бацæттæ кæна, йæ зонындзинæдтæ фидар куы уой, уæд æй иу гæртамуарзаг ахуыргæнæг дæр нæ басæтдзæн. Афтæ кæй у, æцæг, уый загъта Дудиаты Дианæ дæр — ахуырмæ бæрнон цæстæй чи кæсы, фондз азы дæргъы йæхицæн аргъ чи кæны æмæ дæсгай фæлварæнтæ, зачеттæ, курсон куыстытæ дæтгæйæ, иу хатт дæр æхцайы æххуыс чи нæ бацагуырдта, уый. «Студенты зондахаст, ахуырмæ цы цæстæй кæсы, уый аразгæ у, бинонты ‘хсæн цавæр хъомылад райста, уымæй, уый фæстæ та, кæдæм бацыд, уыцы ахуыргæнæндонæй. Хæххон-металлургон институты ахуыры хæрзхъæддзинад сæйраг фарстайыл кæй нымайынц, уый зоны алчидæр. Ахуырæн дзы æппæт фадæттæ дæр ис, ахуыргæнджытæ æппæт хъарутæй архайынц студенттæн зонындзинæдтæ радтыныл. Уымæ гæсгæ нæ институты дипломимæ куыст ссарын дæр æнцондæр у — йæ кад стыр у», — зæгъы Дудиаты Дианæ.
Сырх диплом райсгæйæ, рæхджы йæхæдæг дæр æрлæудзæн æрыгон специалистты рæнхъы, æмæ йæ фидæны куысты бынаты дæр æнтыстджынæй кæй архайдзæн Ирыстоны экономикæйы пайдайæн, уый дызæрдыггаг нæу. Дианæйы дарддæры фæндты та нысангонд ис аспирантурæ, æмæ йын уыцы фæнд дæр рæсугъдæй сæххæст уæд!

Абайты Арбилянæ

 

Предыдущий
Следующий

Ответить

Ваш email не будет опубликован Обязательное поле для заполнения *

*